தமிழ் சினிமாவில் முன்னணி நடிகராக வலம் வருபவர் நடிகர் விஜய் சேதுபதி. முன்னணி ஹீரோவாக வளம் வந்தாலும் எந்த கதாபாத்திரமாக இருந்தாலும் நடிப்பார். சமீபத்தில் காத்து வாக்குல ரெண்டு காதல் படத்தில் சாந்தமாகவும், மற்றொரு பக்கம் விக்ரம் படத்தில் மிரட்டும் வில்லனாகவும் நடித்து ரசிகர்களை வெகுவாக கவர்ந்தவர்.
அது மட்டுமல்லாமல் பேட்ட, மாஸ்டர் மற்றும் விக்ரம் போன்ற படங்களில் விஜய் சேதுபதி வில்லனாக நடித்துள்ளார். இவரின் திரைப்படங்கள் தொடர்ந்து இந்திய அளவில் அனைவரிடமும் கவனத்தை ஈர்த்து வருகிறது. தமிழ் மட்டுமல்லாமல் தெலுங்கு, மலையாளம் மற்றும் ஹிந்தி என பல மொழிகளில் செம்ம பிசியான நடிகராக விஜய் சேதுபதி வலம் வருகிறார்.
இவர் நடிப்பில் இறுதியாக வெளியான மாமனிதன் திரைப்படம் ரசிகர்கள் மத்தியில் நல்ல வரவேற்பை பெற்றது. இயக்குனர் சீனு ராமசாமி இயக்கத்தில் உருவான இந்த திரைப்படம் 2019 ஆம் ஆண்டு எடுக்கப்பட்ட நிலையில் சில காரணங்களால் கடந்த ஜூன் மாதம் வெளியிடப்பட்டது.
இந்த திரைப்படம் வசூல் ரீதியாகவும் விமர்சன ரீதியாகவும் மாபெரும் வரவேற்பை பெற்றது. இதில் நடிகர் விஜய் சேதுபதிக்கு ஜோடியாக நடிகை காயத்ரி நடித்துள்ளார். இந்தத் திரைப்படத்தை இந்த வருடம் டோக்கியோ திரைப்பட விருதுகள் விழாவிற்கு படக்குழு அனுப்பியது. அப்போது மாமனிதன் திரைப்படத்திற்கு தங்கப் பதக்கம் கிடைத்தது.
இந்நிலையில் தாகூர் சர்வதேச திரைப்பட விழாவில் சிறந்த நடிகர் உட்பட மாமனிதன் திரைப்படத்திற்கு மூன்று விருதுகள் அறிவிக்கப்பட்டுள்ளது. இயக்குனர் சீனு ராமசாமிக்கு இரண்டு பிரிவுகளில் இரண்டு விருதுகள் அறிவிக்கப்பட்டுள்ளன . இதுவரை மூன்று சர்வதேச திரைப்பட விழாக்களில் 6 விருதுகளை மாமனிதன் திரைப்படம் பெற்றுள்ளது.